詩作間

Dreamcatcher

19 July 2013

 

印第安人嘅傳說話，好耐以前，一位猶長遇見智慧之神。智慧之神以蜘蛛嘅形象出現，攞走咗猶長手上嘅蘆葦，整成一個圈，再用馬尾毛响上面織網。佢一路織，一路同猶長講，生命係一個循環，每個人都要由細路仔變成大人，由大人變老人家，最後變番細路仔，要人照顧。人生每一個階段入面，都有唔同力量想主宰我哋嘅生命。有啲力量係好嘅，會指示你正確嘅路；有啲係唔好嘅，佢會令你行錯路，令你受傷害。

 

當智慧之神織完個網之後，佢將個網交比猶長，佢話：呢個網就係生命嘅完美循環，中間呢度有個窿，佢會比好嘅力量通過，將惡嘅力量留低。拎住佢，帶領你嘅子民完成佢哋嘅夢啦。

 

所以，每個印第安人嘅床頭，都會有一個捕夢網，佢會比好夢通過；會將惡夢困住。每朝早，當第一線陽光照到人間，惡夢就會蒸發，好似露水一樣，消失得無影無蹤。